Walter von der Vogelweide

Jugendlehren

Niemand kan mit gerten
kindes zuht beherten
den man z'eren bringen mac,
dem ist ein wort als ein slac.
dem ist ein wort als ein slac;
den man z'eren bringen mac:
kindes zuht beherten
nieman kan mit gerten.

Hüetet iuwer zungen,
daz zimt wol den jungen;
stoz den rigel für die tür,
la kein boese wort dar für.
la kein boese wort dar für,
stoz den rigel für die tür:
daz zimt wol den jungen,
hüetet iuwer zungen.

Hüetet iuwer ougen
offenbare und tougen:
lat sie guote site spehen:
und die boesen übersehen;
und die boesen übersehen
lat sie guote site spehen:
offenbare und tougen
hüetet iuwer ougen.

Hüetet iuwer oren,
oder ir sit toren:
lat ir boesiu wort dar in,
daz guneret iu den sin.
daz guneret iu den sin;
lat ir boesiu wort dar in,
oder ir sit toren:
hüetet iuwer oren.

Rezension I Buchbestellung III00 © LYRIKwelt